„Málarar“ og fryst fé

Enn fara „málarar“ um víðan völl og hella úr skálum reiði sinnar. Mjög er eðlilegt að fólk sé reitt, en það er fjarri mér að samþykkja þetta form fyrir útrás reiðinnar. Það er ekki svo að skilja að ég vorkenni þolendunum, sem voru gerendur í aðdraganda hrunsins, nei, alls ekki. En ég vorkenni „málurunum“ fyrir að geta ekki fundið siðmenntaðri leið til að úthella reiði sinni.

En ég er með tillögu. Eru „málararnir“ ekki til í að gerast smiðir? Þeir gætu smíðað gapastokka sem ég hef ítrekað lagt til að settir yrðu upp á Lækjartorgi og útrásarvíkingunum yrði lagt þar. Þeim býðst einn milljarður stolins fjár fyrir hverja viku í gapastokknum. Það eru algjör kostakjör fyrir alla björgólfa landsins.

Slatti af milljörðum hefur fengist frystur á Tortola. Það er af hinu góða og finnst mér þetta vera fyrsta góða fréttin í langan, langan tíma. Vonandi eiga margar slíkar frystingar eftir að fylgja í kjölfarið á næstu dögum, vikum og mánuðum. Ekki veitir okkur af.