Komst ekki að niðurstöðu?

Þetta er furðufrétt. Alþjóð veit að hér er logið og það er ekki þörf á því að mbl.is styðji Árna Pál ráðherra í lyginni. Í fréttinni segir: „Starf framkvæmdastjóra var auglýst að nýju í haust eftir að stjórn sjóðsins komst ekki að niðurstöðu um hvern skyldi ráða í starfið.“

Meirihluti stjórnar vildi ráða Ástu H. Bragadóttur en hún var ráðherranum ekki þóknanleg, svo að hann setti á svið leikþátt, sem gengur út á það að halda því fram að stjórnin hafi ekki komist að niðurstöðu. Svo var skipuð önnur nefnd (sem var lögbrot) og þá hefur vandlega verið tryggt fyrirfram að hún kæmist að einhverri niðurstöðu sem Árni Páll gæti unað við. Öll meðhöndlun málsins fer á svig við gildandi lög í landinu.

Ráðinn framkvæmdastjóri Íbúðalánasjóðs

Slöpp málkennd 9

Girði ég mig enn í brók, sagði kallinn.  Nú vil ég gera athugasemd við þetta hér: Sjálfvirkur vatnshæðarmælir Veðurstofunnar stóð í 3,5 metrum kl. 22:30 í kvöld, en hann var í 1,8 metra um miðjan dag í gær. Þegar ég var í skóla var kennt að tugabrot eins og 3,5 og 1,8 stjórnuðu tölu (eintölu eða fleirtölu) einingarinnar (metra í þessu tilfelli) með þeim hætti, að aftasti aukastafur réði tölunni. Það er sem sagt ekki stafurinn á undan kommu sem hefur áhrif heldur stafurinn á eftir henni. Svo að þar sem segir „hann var í 1,8 metra“ á að vera „hann var í 1,8 metrum“. Hefði dýpið verið 2,1 væri rétt að segja um mælinn: hann var í 2,1 metra (tveimur komma einum metra).

Svo er það breidd brúarinnar. Vá maður eins og börnin segja. Á svona breiðri brú (340 m) gætu 3 júmbóþotur lent samhliða ef hún bara væri nógu löng. Venjuleg flugbraut er ekki nema 60 metra breið.  En flestir eru vanir því að breidd árinnar stjórni lengd brúarinnar. Svo að brúin yfir Gígjukvísl mun vera um 340 m löng en breidd hennar er trúlega á bilinu 10 - 15 m.

Gígja hefur vaxið hratt í dag

Slöpp málkennd 8

Ég var farinn að halda að þessi frétt væri skammlaus. En svo reyndist ekki vera, því að síðasta málsgreinin reyndist gölluð. Svona lítur hún út í fréttinni:

Í Stykkishólmi er það sem liðið af árinu jafnhlýtt og á sama tíma 2003, ívið hærra en 1939.

Hér vantar orðið "er" inn í setninguna, sem á að vera svona:

Í Stykkishólmi er það sem liðið er af árinu jafnhlýtt og á sama tíma 2003, ívið hærra en 1939.

Hiti yfir meðaltali í október

slöpp málkennd 7

Það er þetta r eða ekki r.  Umferðatafir segir blaðamaður. En nei. Það er rangt. Förum nú í ástæðuna einu sinni enn. Orðið umferð er eintöluorð. Án nokkurs vafa. Við tölum aldrei um umferðir. Þegar við ætlum að búa til samsett orð úr tveimur nafnorðum, umferð og tafir, þá þarf að byrja á því að koma orðinu umferð í eignarfall. Flestir vita að það er síðasta fallið þegar orð eru fallbeygð. Hér er umferð - um umferð - frá umferð - til umferðar. Til umferðar, það er eignarfallið. Þess vegna er samsetta orðið umferðartafir en alls ekki umferðatafir.

Svo má kannski líka hafa orð á fornafnafælni, sem er orðin nokkuð algeng og lýsir sér í því að sama nafnorðið er endurtekið í sífellu innan sömu málsgreinar, þegar engin þörf er á því og betur færi á að nota fornafn. Dæmið hér er  Samkvæmt upplýsingum frá lögreglu á Blönduósi er lögreglan á leiðinni á staðinn. Þetta er ekki beinlínis rangt, en ósköp leiðigjarnt málfar. Betur færi á að segja: Samkvæmt upplýsingum frá lögreglu á Blönduósi er hún á leiðinni á staðinn...

Holtavörðuheiði lokuð vegna óhapps

Slöpp málkennd 6

...hefur dæmt íslenskan mann í þriggja ára fangelsi fyrir stórfellt skattsvik. Hér ber að skrifa stórfelld skattsvik. Svik er fleirtöluorð og er ekki til í eintölu, svo að svikin eru stórfelld (en ekki svikið* er stórfellt).

Þá var honum einnig gert að greiða jafnvirði tæplega 400 milljónir íslenskra...  á að vera 400 milljóna íslenskra króna.

Honum  gefið að sök að hafa blekkt ... á að vera Honum var gefið að sök ...

Íslenskur sólkonungur dæmdur í Noregi

Slöpp málkennd 5

Aðstandendur tunnumótmælanna hafa skorað á stærstu atvinnurekendur og verkalýðsfélög landsins auk ráðuneyta til að gefa starfsfólki frí...

Hér er orðinu til alveg ofaukið. Betra væri að segja og skrifa: Aðstandendur tunnumótmælanna hafa skorað á stærstu atvinnurekendur og verkalýðsfélög landsins auk ráðuneyta að gefa starfsfólki frí...

Síðar í fréttinni segir: Þessi krafa er í beinu samhengi við undirskriftarsöfnun...  Þetta er sama atriði og ég ræddi í gær í sambandi við Landeyjahöfn. Hér er fengist við söfnun undirskrifta en ekki undirskriftar. Því skal segja undirskriftasöfnun en ekki undirskriftarsöfnun.

Hvetja atvinnurekendur til að gefa starfsfólki frí til mótmæla

Slöpp málkennd 4

„Samkvæmt upplýsingum frá slökkviliðinu var enginn inn í húsnæðinu...“ segir þar. Orðin inn og inni eru höfð annars vegar um hreyfingu og hins vegar um staðsetningu. Hann fór inn í húsið lýsir hreyfingu einhvers sem kemur að utan. Hann var inni í húsinu lýsir staðsetningu hans eftir að hann er farinn inn. Hér hefði því átt að standa: „Samkvæmt upplýsingum frá slökkviliðinu var enginn inni í húsnæðinu...“

Eldsvoði við Eirhöfða

Slök málkennd 3

Nú vekur fyrirsögnin athygli. Mér var kennt í gamla daga að verstu ambögurnar væru þær sem leyndust í fyrirsögnum, vegna þess að þær væru áberandi og ættu að vera það. Hlaup í Grímsvötnum hafið segir þar. Gallinn er sá að hlaupið er í Gígjukvísl eins og réttilega er sagt í fréttinni, en það er úr Grímsvötnum en ekki í þeim.

Hlaup hafið úr Grímsvötnum

Slök málkennd 2

... og skyldu eftir skilaboð og steina...

Nei. Að skilja eftir er ekki með y.  Svo að skrifa ber:  ... og skildu eftir skilaboð og steina...

Blaðamenn mbl.is hljóta að hafa aðgang að orðabók(um). Eða hvað?

Mótmæltu kynferðislegu ofbeldi presta

Slök málkennd 1

Það veldur mér alltaf ama að sjá illa farið með íslenskt mál. Nú ætla ég að fara að blogga stutta ábendingarpistla um eitt og annað sem ég hnýt um hér á mbl.is. Engin von er til þess að ég taki eftir öllu, enda les ég ekki allar fréttir þessa miðils.

Hér kemur það fyrsta: Rangt mál:  Dagskráin lýkur kl. 16 í dag.  Rétt væri:  Dagskránni lýkur kl. 16 í dag.  Hér er það sagnorðið að ljúka, sem er áhrifssögn og stýrir þágufallinu á dagskránni. Við segjum: einhverju lýkur en ekki eitthvað lýkur. Búið í bili, en stutt verður í næsta.

Greina forngripi á safninu