Slöpp málkennd 18

Í fréttinni sjálfri er talað um vatnamælingamenn, sem er gott og rétt. En undir myndinni er í textanum orðið vatnamælingarmaður, sem er rangt. Hér er um að ræða samsetningu orðanna vatnamælingar og maður. (Maður sem stundar vatnamælingar). Þess vegna þarf að setja „vatnamælingar“ í eignarfall og skeyta síðan „maður“ við. Útkoman er vatnamælingamaður.

Enn vex í Gígju

Slöpp málkennd 17

Er ekki fiskolía venjulega kölluð lýsi?

Undir myndinni er eftirfarandi texti: Lækningamáttur fiskolíu eru dregnir í efa í nýjum rannsóknu. Þetta ætti vitanlega að vera  Lækningamáttur lýsis er dreginn í efa ...

Fiskolía hægir ekki á Alzheimer

Slöpp málkennd 16

Hrint hefur verið að stað átaki ...     af

Einhverju er hrint af stað en ekki að stað.

Vestfirðingar slökkva ljósin

Slöpp málkennd 15

Fyrirfram ríkti nokkur óvissa um úrslitin í Indiana, en úrslitin þykja gefa til kynna ...     Þetta er dæmi um það sem ég vil kalla fornafnafælni. Það fer ekki vel á því að endurtaka í sífellu nafnorðið „úrslitin“. Hér er sjálfsagður hlutur að segja: Fyrirfram ríkti nokkur óvissa um úrslitin í Indiana, en þau þykja gefa til kynna ... 

Það er hlutverk fornafna að koma í stað nafnorða í tilvikum eins og þessu.

Teboðshreyfingin með sinn fyrsta þingmann

Slöpp málkennd 14

Mikil mildi var að ekki yrði banaslys       varð

M.a. þurfti að skilja tvo bíla. Lögregla segir ekkert ferðaveður vera á svæðinu.      Betra væri að nota ekki skammstöfunina, heldur stafa fullt út: Meðal annars ...

Vandséð er hvað það þýðir að skilja tvo bíla. Hvernig skilur maður bíla? Það verður sennilega bara misskilningur. En líklegt þykir mér að blaðamaður hafi ætlað að segja frá því að menn hafi þurft að skilja tvo bíla eftir.

Lá við banaslysi

Slöpp málkennd 13

Efnahagsmál eru talin líklega til að vera aðalkosningamálið... líkleg, verða. Þá væri þetta svona: Efnahagsmál eru talin líkleg til að verða aðalkosningamálið...  En miklu betra væri að segja þetta svona: Talið er líklegt að efnahagsmál verði aðalkosningamálið...

Þá er einnig verið velja ríkisstjóra ...         verið að velja

... því að í hverju ríki hefur sá flokkur sem ræður löggjafarsamkundu ríkisins og ríkisstjóraembættinu hvernig kjördæmin eru dregin upp ...          Þetta er óskiljanlegt eins og það er. Hvað ertu að reyna að segja?

 

 Ef tillagan í Kaliforníu verða samþykkt ...   verður

Fjórtán klukkustundum síðar mun kosningunum ljúka þegar síðustu kjörstöðunum verður lokað ...

Mun betra væri: Kosningunum lýkur fjórtán klukkustundum síðar ...

Hrós fær blaðamaður fyrir að segja:  þegar síðustu kjörstöðunum verður lokað (en alls ekki: þegar síðustu kjörstaðir loka).

Efnahagurinn aðalmálið

Slöpp málkennd 12

Hluta verðlauna ánafnað til Íslands                                  betra:  Hluti verðlauna rennur til Íslands

Hluti verðlaunafjárins verður ánafnað sjálfbærri bankastarfsemi á Íslandi.   kemur í hlut sjálfbærrar

Þema Norrænu náttúru- og umhverfisverðlaunana                                          verðlaunanna

Markmið fjármálastofnananna þriggja er að samræmau hefðbundna              samræma

vinnum við á gagnsæjannhátt                                                                         gagnsæjan hátt

langtíma og sjálfbær þróun                                                              betra:   sjálfbær langtímaþróun

að miklu leiti                                                                                                    leyti

 

Sumt af þessu er smávægilegt en ber þó vitni margumræddu kæruleysi í vinnubrögðum. Vandræðaorðið leiti/leyti vefst fyrir mörgum. Það er þó alls ekki flókið og þarf ekki að vera til vandræða. Rétt er að leggja á minnið að orðið er alltaf með y nema þegar það þýðir hæð eða hóll, sbr. Gróa á Leiti. (Ekki spyrja mig af hverju. Eina svarið sem ég kann við því er af því bara.) Þessa minnisreglu er einfalt að muna og þá gera menn ekki oftar villu þegar velja þarf á milli leitis og leytis.

 

Hluta verðlauna ánafnað til Íslands

Slöpp málkennd 11

Þessi frétt er frekar dæmi um kæruleysi í vinnubrögðum og áhugaleysi gagnvart því sem verið er að gera en „slappa málkennd“. En fingurbrjótarnir eru of margir til að við verði unað án athugasemda.

Hálkublettir er á Hellisheiði.                                          eru

Á Sunnanverður Vestfjörðum er hálka                         sunnanverðum

snjókoma á Hálfdán, á Klettsháls er þungfært            Hálfdáni ... Klettshálsi

Hálka og stórhríð er frá Hofsós í Ketilás.                      Hofsósi

Til sanns vegar má færa að þetta séu allt smáatriði. En höfum það í huga að margt smátt gerir eitt stórt og svona lagað ber kæruleysinu vitni. Ég er viss um að sá sem skrifaði fréttina býr yfir kunnáttunni sem til þarf.

 

Holtavörðuheiði ekki fær fyrr en á morgun

Engar upplýsingar ...

... gefnar um það hvað er til umræðu frekar en fyrri daginn. Er verið að kokka einhvern leynisamning sem síðan á að henda fyrir Alþingi og heimta afgreiðslu á þess að sýna hvað málið snýst um eins og frægt varð á síðasta ári?

Mesta leynimakksstjórn allra tíma á Íslandi er núverandi ríkisstjórn en aldrei hefur nokkur stjórn gasprað jafn hátt í upphafi ferils síns um að allt skuli vera uppi á borðum og upplýsingar verði gefnar.

Svo vogar Össur sér að tala svona. Það eina sem fram kemur í fréttinni er að Össur vonast eftir samkomulagi von bráðar og að aðilar verði sáttir. Þá virðist hann eiga við Jóhönnustjórn versus Breta og Hollendinga. En er nú ráðlegt fyrir hann að sleppa bæði Alþingi og íslensku þjóðinni út úr jöfnunni? Ég held ekki.

Lausn Icesave fyrir lok árs

Slöpp málkennd 10

Ekki er víst að umkvörtunarefnið að þessu sinni sé sök fréttamanns, því að hugsanlegt er að hann taki orðalagið beint frá Viðskiptaráði Íslands. En hvað sem því líður: „... þar segir að þau verkefni sem núverandi ríkisstjórn stendur frammi fyrir séu ekki öfundsverð.“ er orðalag fréttarinnar. Um þetta er það að segja, að verkefni geta hvorki verið öfundsverð né ekki öfundsverð. Það er einungis hægt að öfunda „persónu“ (eða þá ekki öfunda hana) af verkefni sínu. Því færi betur á því að segja að núverandi ríkisstjórn sé ekki öfundsverð af þeim verkefnum sem hún stendur frammi fyrir.

Að þessu sögðu finnst mér rétt að benda á það að herferð mín fyrir bættu málfari hér á þessum miðli virðist vera að bera árangur og er það gleðilegt. Hversu lengi það stendur á svo eftir að koma í ljós. Ég hef aldrei fengið fleiri heimsóknir á bloggið mitt en einmitt tvo síðastliðna daga. Það var ekki tilgangurinn með þessu, en það sýnir mér að fólk almennt hefur áhuga á íslensku og meðferð málsins. Vonandi draga blaðmennirnir nokkurn lærdóm af því og vanda betur til verka sinna hér eftir en hingað til, svo að manni verði ekki flökurt við að lesa fréttir. (Þetta þýðir engan veginn það að ég sé hér með hættur!).

Vilja leggja pólitískan ágreining til hliðar